ဇူလိုင် ၂၆ – ၂၀၂၅
SS (VOM)
တနင်္သာရီတိုင်း၊ မြိတ်ခရိုင်၊ ပုလောမြို့နယ်မှာ မနေ့ ဇူလိုင် ၂၅ ရက်၊ ညပိုင်းက ဒရုန်းနဲ့ လက်နက်ကြီး တိုက်ခိုက်မှု ဖြစ်ပွားခဲ့ပြီး ၁၀ ယောက် သေဆုံးကာ ငါးယောက် ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
အဆိုပါ ဖြစ်စဉ်ဟာ ပုလောမြို့နယ်၊ ဇရပ်ဆိပ်ကျေးရွာမှာ မနေ့ည ၁၀ နာရီ၊ မိနစ် ၂၀ ဝန်းကျင်က ဖြစ်ပွားခဲ့တာဖြစ်ပြီး ဒရုန်းနဲ့ တိုက်ခိုက်မှုကြောင့် တယောက် သေဆုံးကာ နှစ်ယောက် ဒဏ်ရာ ရရှိခဲ့သလို လက်နက်ကြီး ပစ်ခတ်မှုကြောင့် ကိုးယောက် သေဆုံးကာ သုံးယောက် ဒဏ်ရာ ရရှိခဲ့တယ်လို့ သိရပါတယ်။
“ဒရုန်းနဲ့ လက်နက်ကြီးက ရှေ့ဆင့်နောက်ဆင့်ဆိုသလို အဲဒီ တနေရာတည်းကိုပဲ ကျတာ။ ဒရုန်းကျလို့ ကယ်ဆယ်ရေး လုပ်နေကြတုန်း ရှိသေးတယ်။ အဲဒီနေရာမှာ ခရီးသွားတွေရှိတယ်။ တိုက်ပွဲဖြစ်နေလို့ ခဏရှောင်ရင်း ညအိပ်တည်းခိုနေကြတာ။ လောလောဆယ်တော့ ဒီ ပုလောဘက်မှာ အခြေအနေ လုံးဝ မကောင်းဘူးလို့ပဲ ပြောရမယ်။ ကုန်သည်တွေလည်း ဒီအချိန် လာဖို့မသင့်တော့ဘူး” လို့ ဒေသခံတယောက်က ပြောပါတယ်။
ပြီးခဲ့တဲ့ ဇူလိုင် ၂၃ ရက်နေ့မှ စတင်ကာ လက်ရှိအချိန်အထိ ပုလောမြို့နယ်အတွင်း နစကတပ်နဲ့ ဒေသတွင်း လက်နက်ကိုင် တပ်ဖွဲ့တွေကြား တိုက်ပွဲ ပြင်းထန်နေတာဖြစ်ပြီး နစကဘက်မှ ကြည်း၊ ရေ၊ လေ အသုံးပြုပြီး တိုက်ခိုက်နေတာ ဖြစ်တယ်လို့ သိရပါတယ်။
ဒါကြောင့် အမှတ် (၈) ပြည်ထောင်စုလမ်းမကြီးရဲ့ တနင်္သာရီတိုင်း၊ မြိတ် – ပုလော လမ်းပိုင်းကို မနေ့ ဇူလိုင် ၂၅ ရက်မှ စတင်ကာ ရက်အကန့်အသတ်မရှိ ပိတ်ထားမှာဖြစ်တယ်လို့ ဒေသတွင်း လက်နက်ကိုင် တပ်ဖွဲ့တွေက အသိပေး ထုတ်ပြန်ထားပါတယ်။
“ကုန်လမ်းကတော့ ပိတ်သွားပြီ။ ရေလမ်းကလည်း ဘယ်နေ့ပိတ်မယ် မသိဘူး။ လေကြောင်း တိုက်ခိုက်မှုတွေကလည်း ဆက်တိုက်ပဲ။ တိုက်ပွဲ ဒီထက်ပိုပြီး ပြင်းထန်လာရင်တော့ ရေလမ်းလည်း ပိတ်သွားနိုင်တယ်။ ဒါကြောင့် မြိတ် – ပုလောကြား ပိတ်မိနေတဲ့ ခရီးသွားတွေအနေနဲ့ လာရာလမ်းအတိုင်း ပြန်ကြဖို့ကိုပဲ ပြောချင်ပါတယ်။ ကုန်သည်တွေအနေနဲ့လည်း ပုလောဘက်မှာ ကုန်ပစ္စည်းတွေ ပိတ်မိနေတယ်ဆိုရင် ဆုံးရှူံးမှု နည်းနိုင်သမျှနည်းအောင် ရေလမ်းမပိတ်ခင် အမြန်သယ်ကြဖို့ ပြောချင်ပါတယ်။ မြိတ်ဘက်အတက် ပိတ်မိနေတဲ့ ခရီးသည်တွေလည်း မြိတ်ကိုပဲ ပြန်ကြစေချင်တယ်” လို့ နောက်ထပ် ဒေသခံတယောက်က ပြောပါတယ်။
အဆိုပါ မြိတ် – ပုလော လမ်းပိုင်းဟာ တိုက်ပွဲတွေကြောင့် လုံခြုံရေးအရ မကြာခဏဆိုသလို ပိတ်ထားလေ့ရှိပြီး ဒေသတွင်း တိုက်ပွဲဖြစ်ပွားမှု အခြေအနေပေါ် မူတည်ကာ ပြန်လည်ဖြတ်သန်း သွားလာခွင့်ပြုတဲ့ လမ်းပိုင်းတခုလည်း ဖြစ်တယ်လို့ သိရပါတယ်။
နောက်ပိုင်းမှာ ပုလောမြို့နယ်အတွင်း တိုက်ပွဲ ပိုမို ပြင်းထန်လာနိုင်တဲ့အတွက် ဒေသခံ ပြည်သူတွေအနေနဲ့ ဗုံးခိုကျင်းတွေကို စနစ်တကျ တူးထားကြဖို့၊ တိုက်ပွဲ ဧရိယာအတွင်းရှိ ပြည်သူတွေအနေနဲ့လည်း ဘေးလွတ်ရာကို အမြန်ဆုံး ထွက်ခွာကြဖို့ လက်နက်ကိုင် တပ်ဖွဲ့တွေက ထပ်မံ တိုက်တွန်းထားပြီး နစကဘက်ကတော့ လက်ရှိ စစ်ရေး အခြေအနေနဲ့ ပတ်သက်လို့ သတင်း ထုတ်ပြန်ထားခြင်း မရှိသေးပါဘူး။
